Акцијата што ја започна Владата за контрола на угостителските објекти по катастрофалниот пожар во дискотеката „Пулс“ во Кочани, кој одзеде 61 живот, а близу 200 луѓе беа повредени, не е застаната и таа и понатаму продолжува, рече вечерва заменик-министерот за економија и труд, Марјан Ристески, во вечерашното гостување во „Топ тема“ на „Телма“.

Тој рече дека станува збор за акција во која се вклучени повеќе институции и инспекторати, кои вршат вонредни инспекциски надзори, надвор од годишниот план за вакви активности.

Според Ристески, досега се направени околу 300 инспекциски надзори во угостителски објекти, како дел од акцијата што ја води Министерството за внатрешни работи, а во која се вклучени Државниот пазарен инспекторат, Дирекцијата за заштита и спасување, Управата за финансиска полиција, како и општините во делот на ингеренциите што ги имаат преку Заедицата на единиците на локалната самоуправата (ЗЕЛС).

„Во оваа акција од 23 легитимно издадени лиценци за ноќни клубови, кабареа и дискотеки, 13 од нив не ги исполнуваат минималните техничките услови кои ги пријавиле, а само 10 имаат активна лиценца со исполнување на комплетно сите услови. На шест од оние кои не ги исполнувале условите извршена е забрана за дејност и пуштен е допис до Министерството за економија и труд од страна на ДПИ за одземање на лиценцата и парична казна. Направена е контрола и на други угостителски субјекти и досега се изречени казни за неисполнување на минималните технички услови во висина од 3,5 милиони денари“, рече Ристески.