Американскиот малопродажен гигант „Волмарт“ одлучи да ги зголеми цените, а во соопштението наведува дека причините за овој потег се царините воведени за стоки увезени во САД од страна на претседателот на Соединетите Американски Држави, Доналд Трамп. „Волмарт“ се одлучи за овој потег без оглед на релативно добрата добивка во првиот квартал од 2025 година, иако имаше одреден пад во споредба со претходната година. Патем, вреди да се напомене дека „Волмарт“ е најпопуларниот малопродажен синџир во САД, а според истражувањата, дури две третини од Американците купуваат во нивните дуќани, објави „Кликс.ба“.

Многу Американци ги намалија трошоците бидејќи стануваат сè позагрижени за состојбата на економијата. Објавените владини податоци покажаа забавување на растот на продажбата кај малопродажните трговци. „Волмарт“ во четврток изјави дека неговите потрошувачи остануваат претпазливи и селективни. Тарифите на Трамп за стоки од Кина и други земји го загрозуваат моделот на ниски цени што е основа на успехот на „Волмарт“.

Најавените тарифи на Трамп од 145 проценти за кинеските стоки беа намалени на 30 проценти во договорот постигнат оваа недела, додека некои од повисоките тарифи беа ставени на чекање 90 дена. Трговците и увозниците во голема мера престанаа да увезуваат обувки, облека, играчки и други производи додека царините беа толку високи, но сега многумина ќе продолжат да увезуваат од Кина во тој тесен временски период, надевајќи се дека ќе избегнат празни полици оваа есен. Сепак, многу трговци на мало велат дека ќе мора да ги зголемат цените за да ги покријат трошоците за царински давачки. Тие се подготвуваат и за повисоки трошоци за испорака поради ненадејното зголемување на бројот на компании кои брзаат да испорачуваат стока во САД.