Ново гориво кое би можело да предизвика вистинска револуција се тестира на бензинските пумпи во Европа – Супер Е20. Содржи дури 20% биоетанол, што е двојно повеќе од веќе познатиот Е10, и најавува драстично намалување на емисијата на штетни гасови. Сепак, и покрај сите придобивки, пошироката примена сè уште не е можна – и еве зошто. Супер Е20 моментално се тестира во Германија, на бензинска пумпа во Манхајм, и се користи во возниот парк на службени возила. Целта: да се намали зависноста од фосилни горива и до 80% од емисиите на ЦO₂, според германското автомобилско здружение AДАК, пишува Србија данас. Со комбинирање на Е20 со биодизел, вкупната заштеда на емисии може да достигне дури 40%, без потреба од електрификација на возниот парк. Но има еден голем проблем – законот сè уште не го дозволува тоа.

Сегашната европска норма дозволува максимум 10% етанол во бензинот, што значи дека Е20 не може официјално да се продава – сè додека не се променат стандардите. Повеќето модерни автомобили би можеле да се справат со Е20 без поголеми проблеми, но сè уште нема официјална потврда од производителот. Кај постарите возила, можни се дефекти на пумпите за гориво и системите за вбризгување, а евидентирано е и зголемување на потрошувачката на гориво за околу 3%. AДАК повикува на јасни информации и предупредувања, за да се избегне забуна како воведувањето на E10 – кое многумина сè уште го избегнуваат, иако е безбедно за повеќето возила.