Американскиот претседател Доналд Трамп го брани својот соработник, бизнисменот Илон Маск, среде растечкото незадоволство во неговата администрација откако некои федерални агенции им рекоа на своите работници да го игнорираат барањето во е-пошта на Маск да му напишат што работат. Ова е прво незадоволство од ваков вид по формирањето на Одделот за владина ефикасност (ДОГЕ), кој го предводи Маск, а кој има намера да ја постигне ефикасноста на јавниот сектор со нејзино намалување, што значи отпуштање на голем број вработени во јавниот сектор, објави Кликс.ба. Новоизбраните раководители на одредени институции, меѓу кои и директорот на ФБИ, Каш Пател и директорот на Националната разузнавачка служба (НСА) Тулси Габард, им порачаа на своите колеги да не ја почитуваат наредбата на Маск.

Имено, во наредбата до вработените испратена по мејл, Маск им рекол да запишат што направиле минатата недела, а доколку не го сторат тоа, ќе добијат отказ. Бидејќи бројот на јавните институции незадоволни од она што го бара Маск се зголеми, Канцеларијата за управување со персонал (ОПМ) им порача на вработените да одговорат, но дека нема да има отпуштања. Со оглед на тоа што на најбогатиот и најистакнат соработник на Трамп му се закануваше, како што пишува весникот Гардијан, губење на образот и авторитетот, Трамп средбата со францускиот претседател Емануел Макрон во Белата куќа ја искористи за да му ја изрази довербата на Маск.

Колку е напната ситуацијата покажува и фактот дека конгресменот Марк Алфорд, кој доаѓа од Републиканската партија на Трамп, беше на удар на тежок вербален напад во градот Белтон, Мисури, зборувајќи за тоа што прави ДОГЕ. Тој беше буквално опкружен со десетици незадоволни луѓе, од кои многумина не можеа да влезат во просторијата каде што тој зборуваше. Мораше да интервенира и полицијата за да спречи физички напад врз него.