Во Националниот парк Јелоустоун е родено ретко бело теле бизон, за што членовите на племето на домородните Американци велат дека е знак дека мора да се направи повеќе за да се заштитат земјата и животните.

„Раѓањето на ова теле е и благослов и предупредување. Мораме да направиме повеќе“, изјави духовниот водач на индијанските племиња Лакота, Дакота и Накота во Јужна Дакота, Арвол Лукинг Хорс, објави денеска Си-Би-Ес њуз.

Раѓањето на такво теле доаѓа откако суровата зима во 2023 година истера илјадници бизони од Јелоустоун и уби повеќе од 1.500 од нив.

За индијанското племе Лакота, раѓањето на белото теле е слично на второто доаѓање на Исус Христос, вели Лукинг Хорс, додавајќи дека уште едно такво теле е родено во Висконсин во 1994 година и го добило името „Чудо“.

Според Министерството за внатрешни работи на САД, бизоните се најголемите цицачи во Северна Америка, а мажјаците можат да тежат и до 900 килограми. Нивната сезона на парење трае од средината на јули до средината на август, во текот на која тие можат да бидат поагресивни отколку во други периоди од годината.

На почетокот на овој месец, 83-годишна жена беше тешко повредена кога ја проголта бизон во Јелоустоун.