Во самиот процес на проширување на Европската унија, економската соработка понекогаш била занмарувана и запоставувана, но самиот факт што Унијата е главен трговски партнер на земјите од Западниот Балкан ја покажува нејзината важност. Кога ќе се погледне на актуелната состојба, посебно на геополитичките тензии, прашањето за поблиската економска соработка меѓу земјите од Западниот Балкан добива на важност, изјави претседавачот на Делегацијата на Европскиот парламент во Мешовитиот парламентарен комитет ЕУ-Северна Македонија, хрватскиот европратеник Карло Реслер.

-Кога ќе се погледне на актуелната состојба, посебно на геополитичките тензии, прашањето за поблиската економска соработка меѓу земјите од Западниот Балкан добива на важност, изјави претседавачот на Делегацијата на Европскиот парламент во Мешовитиот парламентарен комитет ЕУ-Северна Македонија, хрватскиот европратеник Карло Реслер, јавува МИА.

Во обраќањето на втората сесија на форумот „Самит ЕУ-Западен Балкан“, насловена „Отклучување на економскиот потенцијал: Раст и интеграција преку пристапување во ЕУ“ што се одржува денеска во Брисел, Реслер нагласил дека поблиската економска соработка е важна и тоа се обидуваат да го постигнат преку Планот за раст на Западниот Балкан.

Тој потенцирал дека Реформските агенди во рамки на Планот за раст што ги подготвија земјите од регионот се добра основа за ова, но дека сега останува тие да се спроведуваат во пракса.

– Шесте милијарди во грантови и позајмици може да бидат корисни за оваа цел и навистина да помогнат за подобра интеграција на земјите од Западниот Балкан и да ги подготват економски, но и инфраструктурно за стандардите на Европската Унија, истакна Реслер.

Според раководителот на Одделот за политика и регионална стратегија за Западниот Балкан при Генералниот директорат за соседство и преговори за проширување на Европската комисија (ДГ НЕАР), Томас Хаглајтнер, промената на начинот на кој земјите од Западниот Балкан гледаат на заедничкиот регионален пазар е предуслов за зајакнување на економската соработка во регионот.

Хаглајтнер порачал дека интегрирањето на земјите од Западниот Балкан во единствениот европски пазар е предуслов за посилна економска интеграција на регионот.

Сепак, според него, заедничкиот регионален пазар не треба да се смета за замена за пристапувањето на земјите од Западниот Балкан на единствениот пазар на ЕУ.