Македонскиот ракометен репрезентативец Михајло Младеновиќ ја продолжува кариерата во Франција, каде што потпиша двегодишен договор со тимот на Кретеј, клуб кој се натпреварува во втората по ранг лига во францускиот ракомет.

Од клубот потврдија дека биле во потрага по лев бек кој ќе му биде соодветна поддршка на Давид Иглесијас, а стручниот штаб изборот го направил токму со ангажманот на Младеновиќ.

„Можеме да потврдиме дека потпишавме двегодишен договор со Михајло Младеновиќ. Тој беше дел од нашите подготовки и по неколку недели тестирање, донесовме одлука да му понудиме договор“, соопштија од Кретеј.

Младеновиќ минатата сезона настапуваше за Алкалоид, со кој имаше успешна година, крунисана со освојувањето на ЕХФ Европскиот куп.