Полскиот премиер Доналд Туск најави реконструкција на владата во обид да ја зајакне владејачката коалиција и да ја врати изгубената поддршка кај граѓаните, по поразот на претседателските избори и зголемените критики за управувањето со клучни прашања, пишува Политико.

Туск претстави серија кадровски промени и нови институционални решенија. Овие потези доаѓаат по изборната победа на опозицискиот кандидат Карол Навроцки, кој на 6 август ќе ја преземе претседателската функција, и во услови на опаѓање на поддршката за коалицијата на Туск.

Според последната анкета на CBOS, 48% од граѓаните изразуваат незадоволство од владата, а поддршката останува на 32%.

Опозициската партија Право и правда (ПиС) го осуди потегот за реконструкција, нарекувајќи го „понатамошно уништување на Полска“. Потпретседателот на ПиС, Мариуш Блашчак, саркастично оцени дека „некомпетентни луѓе се заменети со други некомпетентни луѓе“.

Туск, сепак, повика на оптимизам: „Времето на постизборна траума завршува денес. Ниту еден пораз не е доволна причина за предавање.“

Иако со воздржан став кон либералната агенда на владата, идниот претседател Навроцки најави дека ќе поддржи закони што се во интерес на граѓаните, особено оние поврзани со даночни ослободувања и економска дерегулација.