Оваа сезона по нови патишта до главниот туристички центар. Заврши реконструкцијата на патот Охрид – Свети Наум, една од најфреквентните делници што води кон плажите, НП Галичица и соседна Албанија. По четири децении патот во должина од 24 километри, конечно е целосно рехабилитиран, поставена е и комплетно нова сообраќајна сигнализација, објави МРТ.
Оваа доста значајна туристичка, но и регионална делница наместа беше речиси руинирана. Со инвестиција од околу 11 милиони евра, денес е нов и безбеден пат. И охриѓани и туристите задоволни велат овој проект е од големо значење.

– Патуваме од Германија, дојдовме преку планината. Нагоре патот беше добар, но на некои места не е. Видовме реконструкција – забележува еден турист од Германија.
– Патиштата околу езерото се многу добри – вели гостинка од Германија.

Забрзано тече и изградбата на автопатот Охрид – Кичево. Првите 40-ина километри од Врбјани до Охрид, со исклучок на Ботун, ќе бидат пуштени на крајот од овој месец.

– Се изведува последната фаза пред асфалтирање и градежни активности на клучките Арбиново и Издеглавје. Почната е првата фаза на клучката Требениште, а интензивно се работи од Подмоље на изградба на столбови за натпатник, потпорен ѕид, како и на изградба на фекална и атмосферска мрежа – велат од Јавното претпријатие за државни патишта.
Патната инфраструктура се смета за основа за развојот на туризмот.

– Без патишта нема туризам, може да ги имате најубавите атракции, ама ако се непристапни, не може да развивате туризам. Она што е важно е дека се работи и се надеваме дека пред онаа главна сезона патиштата ќе бидат спремни – вели Сашо Коруноски, професор на ФТУ Охрид.