АД ЕСМ, Подружница РЕК Битола на 14 декември 2019 година распиша оглас за вработување на 182 лица, а на 21.12.2019 година оглас за вработување на 12 лица. Станува збор за потреба од работници на различни позиции, како што меѓудругото, се технолошко чистење, заварувач, брава, наведуваат во соопштението од РЕК Битола.

-Огласот за вработување е логична последица на потребата за обновување на човечкиот потенцијал со кој располага РЕК Битола ако се знае дека во текот на 2019 година на 208 работници им престанал работниот однос по различни основи. Во најголем дел заради остварување на правото на пензија- наведуваат во соопштението од РЕК Битола.

Слична е состојбата со бројот на вработени во комбинатот и за минатата, 2018 година, кога на 100 работници им престанал работниот однос по разни основи, а се вработилe 68 лица.

-Некоректно и тенденциозно е тврдењето дека се врши масовна партизација на РЕК Битола во услови кога се работи за едноставно пополнување на работни позиции од кои зависи производствениот процес и кога огласот беше јавен и транспарентен, согласно законските прописи- велат од РЕК Битола.

РЕК Битола бара од политичките партии да се однесуваат одговорно кон најголемиот производител на електрична енергија во земјата и кога се зборува за Енергетската стратегија за периодот 2020 – 2040 година. Хипотетичките сценарија за развој на енергетскиот сектор во Република Северна Македонија недозволиво е да се претворат во “приказни за плашење на мали деца”.

Оваа соопштение на РЕК Битола уследи откако денеска на прес-конференција, Стевче Антовски од ВМРО-ДПМЕ, обвини дека мотивите на власта не се ништо друго туку предизборен поткуп.

-На  14 – ти декември оваа година на само 20 – тина дена пред техничка влада Заев распиша оглас за вработување на 194 лица во РЕК Битола. Додека беа опозиција тврдеа дека имаме преполна администрација, за сега самите да трупаат партиски војници на позиции каде што се бара стручност и компетентност- рече Стевче Антовски од ВМРО-ДПМЕ.