Трилече е еден од најсочните колачи, чии главни состојки се млекото и карамелата. Но, ако не сте љубител на карамела или едноставно сакате да пробате нешто ново, сè попопуларниот крем од ф’стаци би можел да биде добра замена.

Кремот од ф’стаци е популарен во последно време, со оглед на тоа дека е една од главните состојки на Дубаи чоколадото, а ако сте љубители на сочни, меки бисквити и десерти без чоколадо, тогаш направете трилече со ф’стаци.

Исто така, на крајот овој десерт можете да го декорирате и со сечкани ф’стаци.

Состојки:

– 150 грама брашно
– половина ќесичка прашок за печиво
– 6 јајца
– 120 грама шеќер
– 2 ќесички ванилин шеќер
– 800 мл млеко + 50 грама шеќер
– 500 мл слатка павлака
– 2 лажици крем од ф’стаци

Подготовка:

За почеток, одвојте ги белките од жолчките. Матете ги белките додека да добиете цврст снег, а потоа додајте го шеќерот и продолжете со матење додека шеќерот се растопи. Потоа постепено додавајте ги жолчките, но важно е да се матат на најмала брзина на миксерот.

Измешајте ги брашното и прашокот за печиво и додајте ги во смесата со јајцата, па продолжете со матење на најмала брзина. Сипете ја смесата во калап (20х30 см) обложен со хартија за печење и печете околу 20 минути во загреана рерна на 180 степени.

Откако ќе се испече пандишпанот, оставете го да се излади во калапот, а подоцна извадете го од калап. Во калапот сипете 450 милилитри слатка павлака, а 50 милилитри оставете ги за подоцна. Нежно превртете го пандишпанот наопаку и вратете го во калапот, па прелијте го со млекото измешано со 50 грама шеќер. Потоа, преостанатите 50 милилитри слатка павлака изматете ја со кремот од ф’стаци и премачкајте преку пандишпанот. На крајот, десертот можете да го декорирате со парчиња ф’стаци.