Кари е популарно јадење во азиската кујна. Тоа е оброк базиран на месо, риба или зеленчук, зготвен во богат пикантен сос со кокосово млеко, а најчесто се служи со варен ориз.

Главните состојки во ова јадење се брокула, компири, моркови и пиперки. Не грижете се ако ги немате сите состојки на списокот – можете да користите и некој друг зеленчук што го имате во фрижидер.

Наместо брокула, на пример, можете да користите карфиол, а наместо компири, додадете малку леќа или варен наут, кој на јадењето ќе му понуди и вреден извор на протеини од растително потекло.

Состојки:

– 400 мл полномасно кокосово млеко од конзерва

– 250 мл супа од зеленчук (бујон)

– 100 грама боранија

– 1 мала главица брокула

– 1 голем компир

– 1 главица кромид

– 1 морков

–  1 пиперка

– 3 лажици црвена кари паста

– 3 лажици соја сос со намалена содржина на сол

– 2-3 чешниња лук

– 2 лажички шеќер

– парче ѓумбир со големина од околу 2 см

– растително масло по желба

Подготовка:

Во големо тенџере загрејте малку масло, а потоа издинстајте ги сечканиот кромид и пиперката. Пропржете го зеленчукот околу три минути.

Додадете рендан ѓумбир и сечкан лук. Сè заедно динстајте уште околу една минута.

Додадете ја кари пастата, сè добро измешајте и динстајте околу една минута.

Прелијте го зеленчукот со супата од зеленчук и кокосовото млеко од конзерва. Зачинете со шеќер.

Во тенџерето додадете ги исчистените и исечени моркови и компири – варете на ниска температура околу 15 минути.

Додадете ги цветчињата брокула и боранијата и варете уште 5 до 10 минути додека зеленчукот не омекне и компирите не се сварат до крај.

На крај зачинете со соја сос и послужете со варен ориз.

Пријатно!