Идеална опција за појадок, ручек или вечера е посна солена пита, а една од омилените на домаќинките е питата со праз и ориз.

Освен неповторливиот вкус што му го дава на секое јадење, да не ги заборавиме и корисните својства на овој необичен зеленчук. Празот содржи 13,4 отсто суви материи, 1,3 отсто протеини, 6,7 отсто шеќери, големо количество на витамини и минерални материи. Изобилува со витамин Ц, а од минерали, празот е богат со манган, фолна киселина, железо, магнезиум, фосфор, калиум и калциум. Има мала енергетска вредност, нискокалоричен е и во 100 грама праз има само 28 калории.

Благодарение на него, за вашите домашни ќе направите една од највкусните солени, сочни крцкави пити – со богат фил од ориз и праз. Кога уште топла од рерна ќе ја сервирате со јогурт или со кисело млеко, нема да има дилема. Ќе ви биде јасно зошто оваа пита заслужува да биде на вашата трпеза барем еднаш месечно.

Оваа пита се прави од евтини намирници, вкусна е и можете да ја подготвите за час… Еве еден едноставен рецепт.

Состојки:

– ½ кг тенка кора за пита
– 3 снопови праз
– 150 грама ориз
– сол
– бибер
– масло
– кисела вода

Подготовка:

Сварете го оризот во солена вода, а потоа процедете го и оставете го настрана да се излади. Внимавајте, зрната ориз да останат цели. Празот исечете го на кругови и подинстајте го на малку масло. Соединете ги празот и оризот, а потоа додадете сол и бибер по вкус.

Маслото и киселата вода ставете ги да зовријат, па потоа тргнете ги од ринглата.

Првите две кори премачкајте ги со масло и со кисела вода, третата исто така, но врз неа распоредете го филот од празот и оризот. Завиткајте ги во ролна и ставете во плех на кој претходно сте ја ставиле хартијата за печење. Направете го истото и со преостанатите кори и филот.

Ролованите питички премачкајте ги со масло и печете ги во загреана рерна на 200 степени Целзиусови околу 25-30 минути додека не поруменат.

Питата исечете ја на парчиња и послужете.