Рецепт за чискејк со лимон и прелив од бело чоколадо
Популарниот колач – чискејк овој пат со освежувачки кремаст вкус што многу едноставно ќе го подготвите, а ќе му се допадне на целото ваше семејство.
Препорачано
Состојки за кората:
– 250 г мелени бисквити
– 125 г маргарин (омекнат)
– 100 мл газиран сок од портокал
Состојки за кремот:
– 300 г крем-сирење
– 2 големи лимони (сокот и кората)
– 60 г маргарин или путер
– 150 г шеќер
– 3 јајца
– 200 мл слатка павлака
Состојки за преливот:
– 100 г бело чоколадо
– 4 лажици слатка павлака
– 50 г маргарин или путер
Подготовка:
1. Во сад измешајте ги мелените бисквити, омекнатиот путер и газираниот сок.
2. Обложете со хартија за печење мала тепсија (20 на 18 см). Потоа обликувајте го тестото од бисквити за кората според хартијата. Ставете го да се пече во претходно загреана рерна на 175 степени околу 15 минути. Потоа извадете ја кората од рерна и оставете ја да се излади.
3. Во соодветно тенџере ставете ги сокот од лимон (150 мл), ренданата лимонова кора, шеќерот и путерот и варете ги на пареа. Потоа оставете ја смесата да се олади. Изматете три јајца и измешајте ги со изладениот крем од лимон. Вратете го тенџерето на оган и варете додека смесата не се згусне, притоа постојано мешајќи. Тргнете го тенџерето од оган и оставете смесата да се излади.
4. Настрана изматете ја со миксер слатката павлака и направете шлаг.
5. Изматете го и крем-сирењето што претходно треба да седи на собна температура.
6. Во изладениот крем од лимон додајте го крем-сирењето, па на крај соединете ги со слатката павлака. Сите состојки добро измешајте ги. Распоредете го добиениот крем врз кората од бисквити. Убаво израмнете.
7. На пареа стопете го белото чоколадо со слатката павлака и 50 грама маргарин. Со ова прелијте го колачот.
8. Ставете го готовиот колач во фрижидер и оставете го да преноќи за да се излади добро.
