„Ова не е суд, ова е пародија“ реагира здружението Нова политичка емиграција на Бугарите од Македонија откако судот во Охрид пресуди затворска казна од 8 месеци за двајцата охриѓани за претепувањето на македонскиот Бугарин Христијан Пендиков, секретар на поранешниот бугарски клуб во Охрид „Цар Борис Трети“.

Охридскиот суд по двегодишен судски процес ги прогласи за виновни Илија Спасески и Борче Ангелов за нанесување тешка телесна повреда од прв степен. Но, ги ослободи од обвинението дека го претепале Пендиков од омраза кон Бугарите.

Здружението ги повикува македонските власти да ја преиспитаат оваа казна и да се погрижат таа да ја одразува тежината на кривичното дело.

-Императив е Република Северна Македонија да ги зајакне своите закони против злосторствата од омраза и да обезбеди подобра обука за својот судски систем. Европската унија треба да ја земе предвид оваа одлука и да го преоцени напредокот на Република Северна Македонија во почитувањето на основните човекови права. Време е за бескомпромисна акција – затоа што следниот Пендиков можеби нема да преживее! – се заклучува во ставот на здружението.