Култното скопско радио Џез ФМ веќе една година работи во нов просторен амбиент и со нова авторско-водителска екипа, но и со нова визија за квалитет, релевантност, иновативност и достапност.

Пријатна и топла работна атмосфера затекнавме при посетата на новите простории на радиото Џез ФМ во Скопје. Малата, но вредна екипа заедно со уредничката Стефана Марковиќ посветено работеше на креацијата на радиопрограма со која џез-музиката ја прават подостапна и попривлечна за слушателите, притоа негувајќи високи стандарди за квалитет и во авторска и во продукциска смисла.

Во шумата од звуци на радиоскалата само на една фреквенција 24 часа се емитува џез-музика. Каков предизвик е да се биде главен и одговорен уредник на Џез ФМ?

– Да се биде главен и одговорен уредник на ЏезФМ значи да се прифати предизвикот за избор, уредување и одлучување за програмата што се емитува секојдневно на фреквенцијата 100.8 MHz, задоволување на вкусовите на разновидната слушателска публика и целосно почитување на стандардите во работењето на радиото, кое постои во скопскиот етер веќе 25 години. Да се биде дел од тимот на ова култно скопско радио е огромна чест.

Пред околу една година се случи ребрендирање на радиото. За што поточно станува збор, имајќи предвид дека и претходно радиото си имаше специфичен круг на слушатели?

– На почетокот на 2024-та година се смени сопственичката структура на радиото. Обновеното радио доби нови простории и нов тим. Следеше ребрендирање на радио Џез ФМ, техничко опремување, се подготвуваше продукцискиот дел и се планираше програмата. Сите овие промени се случуваа во колегијална атмосфера и соработка меѓу претходниот и сегашниот сопственик, но и со почитување и имплементирање на сугестиите од долгогодишните пријатели и слушатели на Џез ФМ радио. Соработката сè уште трае и навистина е голема среќа што сите ја делиме љубовта кон џез-музиката и радиото. ЏезФМ 100.8 MHz има слушатели што ја забележаа промената и секојдневно стекнува многубројни нови слушатели, на наше огромно задоволство.

Која е водителската/новинарската екипа на радиото и со каков концепт ја подготвувате програмата?

– Нашата главна цел во подготовка на програмата е популаризацијата на џез-музиката. Сакаме да привлечеме нови слушатели и помлада публика преку претставување досега нечуени џез-артисти, а преку нивната музика слушателите да ги запознаеме со развојот и текот на жанрот до денешен ден, како и со употребата на џез-јазикот во другите жанрови, како што е светската музика. Други сегменти од нашата програма целат кон едукација на публиката за историјата на овој правец и промоција на културната сцена во Македонија. Џез-музиката е толку разновидна, што сакаме да ги покажеме сите нејзини страни.

Во реализација на програмскиот концепт техничкиот дел му е доделен на секогаш подготвениот и неуморен Маријан Гријаковиќ. Во авторско- водителскиот тим на радиото членува посветената Јасна Николовска Овчаровска – авторка и водителка на дневната емисија „Дневна сесија“, во која таа континуирано претставува нови музички изданија и ја промовира културата и културните настани во Скопје и регионот. Освен Јасна, како автори и водители на емисии се ангажирани неколку надворешни лица, соработници на радиото, чиј личен печат и музички интереси може да се чујат во нашите радиоемисии.

Покрај емитување во етерот, сега радиото е достапно и преку стримингот на интернет. Колку новите технолошки алатки се важни за опстојување на радиото како медиум?

– Стримингот официјално го пуштивме во август минатата година. Сметам дека интернет-стримингот е многу важна алатка за да допреме до повеќе луѓе што физички не се наоѓаат во регионот на град Скопје, но се љубители на музиката и радиото. Преку стримингот нашата радиопрограма допира до слушатели од сите градови во Македонија и другите држави. Сметам дека следење и имплементирање нови технолошки алатки е важно за одржување релевантност на радиото, но ова главно важи за секој бизнис.

Во Македонија има мала, но компактна и силна џез-сцена. Колку успевате во програмата да вметнете и македонска џез-музика?

– Секојдневно емитуваме македонска џез-музика на нашата фреквенција. Освен емитување на музиката, континуирано ја промовираме сцената, настапите и новостите од областа на џез-музиката. Среќна сум што повеќето џез-музичари ни се пријатели и се секогаш отворени за соработка.

Планираме да ги зголемиме активностите во овој дел во иднина, со нови идеи и концепти, па така, сметам дека ова е добра прилика да ги повикам сите автори на џез-музика да ни ја испраќаат својата музика и преку тоа да ја зголемиме фонотеката на радиото.

На крајот, како лично ја чувствуваш магијата на радиото?

– За мене, магијата на радиото е интеракцијата со слушателите и моите колеги, односно нашето присуство во аудиопросторот на слушателите и нивните позитивни реакции. Секогаш се радувам на повици, пораки, коментари, писма и посети од слушателите. Луѓето сакаат да го дадат своето мислење и својот придонес за подобрување, а на нас тоа многу ни значи.

Колегите, пак, ја создаваат секојпат кога снимаат и кога ќе ги слушнам дека се кикотат, затоа што Јасна прочитала некој португалски збор погрешно, или на Мац му текнала некоја асоцијација со што песната добива нов наслов, ја внесуваат секојдневно магијата на доброто расположение.

(Разговорот е објавен во „Културен печат“ број 274, во печатеното издание на весникот „Слободен печат“ на 29-31.3.2025)