Драги Рашковски како првообвинет во случајот „Софтвери“ доби казна затвор од вкупно осум години. За злоупотреба на службената положба осуден е на седум години затвор, а за перење пари доби казна затвор од една година и шест месеци. На Рашковски му се пресметува и времето поминато во домашен притвор сметано од 16 април 2021 година.

Второобвинетиот Ивица Димитровски е осуден на пет години казна затвор, Игор Христов на пет години и шест месеци, Даниел Станчев е осуден на четири години, а Ирена Ивановска доби три години и шест месеци. Хонорарците Игор Ивановски и Маја Силјановска се осудени на три години затвор.

Драги Рашковски, не ги извршил службените должности при спроведување на четири постапки за јавна набавка за систем за биометриска идентификација, јавна набавка на софтвер за определување на просечна брзина на возила во сообраќајот и изрекување на казни, набавка на АНПР камери за препознавање на регистарски таблички за возила и јавна набавка на метални кабини за потребите на системот на биометриска идентификација и систем за автоматско препознавање на регистарски таблици.

Пресудата ја изрече Судечкиот совет на чело со судијката Фанка Јанчулева-Михаиловска во Основниот кривичен суд Скопје. Пресудата не е правосилна, а странките имаат право на жалба до Апелацискиот суд.

Обвинителката Ивана Трајчева предложи да се определи мерка притвор за неправосилно осудените Рашковски, Димитровски, Христов поради можност истите да се дадат во бегство.

Завршни зборови за „Софтвери“: Рашковски ги изнесе аргументите со кои ги побива „седумте теории на Обвинителството“