Два листови хартија со нацрт-текст за големиот хит на Боб Дилан „Mr Tambourine Man“ се продадени на аукција во САД за 508.000 долари, објавија британските медиуми.

Овие листови хартија содржат три верзии на текстот напишани на машина за пишување, со белешки на третата верзија, пишува „Гардијан“.

Листовите со стиховите беа продадени на аукција во Нешвил, Тенеси и беа меѓу 60-те предмети поврзани со Дилан кои беа пуштени во продажба, вклучително и 50 парчиња од личната архива на Ал Ароновиц. Продажбата беше голем успех, при што вкупната вредност на 60-те предмети достигна речиси 1,5 милиони долари (1,45 милиони евра).

Во март 1964 година, Ароновиц се разбудил и го пронашол тогаш 22-годишниот Дилан како спие на софата, а текстот на „Mr Tambourine Man“ го нашол во неговата корпа за отпадоци, пишува „Гардијан“.

Дилан потоа, според британскиот весник, ја поминал ноќта пишувајќи и ревидирајќи ја својата нова песна на машина за пишување во домот на Ароновиц во Њу Џерси.