Ракетите „томахавк“ можат да носат нуклеарно оружје, а испораката на овие ракети во Киев би можела да доведе до сериозна ескалација, изјави денес портпаролот на Кремљ, Дмитриј Песков.

„Претседателот Путин јасно го искажа ставот на Русија за испораката на „томахавк“. Ова би била сериозна ескалација, но нема да ја промени ситуацијата на двата фронта за режимот во Киев“, рече тој.

Песков нагласи дека е потребно да се почекаат појасни изјави од американскиот претседател Доналд Трамп во врска со испораката на овие ракети, пренесува РИА Новости.

Тој нагласи дека употребата на овие ракети во Украина нема да вклучува директно учество на американски воен персонал.

Зборувајќи за дијалогот меѓу Русија и САД, тој рече дека контактите преку нивните дипломатски мисии остануваат бавни, но дека ситуацијата на ниво на шефови на држави е „нешто пожива“.

„Дипломатите си ја работат својата работа. Тие работат вредно, иако дијалогот меѓу нашите дипломатски агенции останува пригушен“, рече Песков.

Тој рече дека Русија верува оти Трамп останува посветен на ублажување на украинскиот конфликт преку мировни преговори.

„Продолжувам да повторувам дека засега тргнуваме од претпоставката дека претседателот Трамп ја задржува политичката волја да го олесни преминот на украинското решение во каналот на мирни политички преговори“, рече Песков.

Тој оцени дека Европската Унија е „заложник на неограничената политика на балтичките земји и Полска по многу прашања од надворешната политика“.