Британската министерка за финансии Рејчел Ривс денеска изјави дека работата од дома ги намалува можностите за зголемување на економската продуктивност, и покрај тоа што мнозинството членови на владата планираат да донесат закони во корист на флексибилно работење и работа од дома.

„Јас сум за тоа да бидеме флексибилни и да се погрижам луѓето да можат да балансираат помеѓу работата и семејниот живот, но мислам дека продуктивноста е поверојатно да се зголеми кога ќе разменувате и спојувате идеи“, рече Ривс, според Ројтерс.

Таа изјави дека нејзините соработници имаат корист од работата во канцеларија, наместо периоди на онлајн состаноци.

Минатата недела британскиот министер за трговија Џонатан Рејнолдс изјави дека не му е приоритет да има вработени на исто место, додавајќи дека работодавците треба да ги оценуваат вработените според резултатите, а не според нивното физичко присуство на работното место, пренесува Танјуг.

„Ако сакаме да се справиме со ниската продуктивност во Британија, ајде да ги оценуваме луѓето според она што го прават, според нивните резултати, а не според тоа дали седат на маса“, рече тој.