Претседателот на Русија, Владимир Путин, во четвртокот изјави дека Русија ќе реагира брзо доколку смета дека Европа ја провоцира и нагласи дека речиси целата НАТО алијанса предводена од САД во моментов војува против Русија во Украина, објави „Ројтерс“.

Војната во Украина, најсмртоносниот конфликт во Европа од Втората светска војна, предизвика најголема конфронтација меѓу Русија и Западот од Кубанската ракетна криза во 1962 година.

Путин, говорејќи на дискусионата група „Валдај“ во црноморското одморалиште Сочи, рече дека руските сили напредуваат по целата линија на фронтот во Украина.

„Сите земји членки на НАТО се борат со нас,“ изјави Путин.

Тој додаде дека НАТО земјите ѝ обезбедуваат на Украина разузнавачки податоци, оружје и обука. Доколку Европа ја провоцира Русија, рече тој, одговорот ќе биде брз.

„Ако некој сè уште има желба да се натпреварува со нас на воен план, како што велиме, слободно, нека се обидат. Контрамерките на Русија нема долго да се чекаат,“ истакна Путин.

Орбан: Украина не е суверена земја, таа е финансирана од ЕУ, а Западот ѝ дава оружје

Путин: Ако Русија е „хартиен тигар“, Западот слободно нека се соочи со „хартиениот тигар“

Путин ги отфрли тврдењата на американскиот претседател Доналд Трамп дека Русија е „хартиен тигар“, велејќи дека Русија ја има најспособната армија во светот.

Тој додаде дека ако Русија навистина е „хартиен тигар“, тогаш и НАТО е истото, па го предизвика Западот да се соочи со тој „хартиен тигар“ ако навистина мисли дека тоа е случај.

Русија, тврди Путин, низ вековите покажала дека секогаш бргу реагира кога ќе биде испровоцирана.

„Елитите на обединетата Европа продолжуваат да шират хистерија. Излегува дека војната со Русите е речиси на прагот. Тие го повторуваат ова бесмислие, оваа мантра, постојано,“ додаде тој.

„Смирете се, спијте мирно“

Тој ја отфрли идејата дека Русија еден ден би нападнала земја членка на НАТО како „невозможно за верување“.

„Искрено, само сакам да кажам: смирете се, спијте мирно и грижете се за своите проблеми. Доволно е да погледнете што се случува на улиците на европските градови,“ рече Путин.

Западноевропските лидери и Украина ја претставуваат војната како империјалистичко присвојување територии и повеќепати ветиле дека ќе ги поразат руските сили. Тие предупредуваат дека, доколку Русија не биде поразена, Путин би ризикувал напад и врз земја членка на НАТО.

Путин, пак, ја претставува војната како пресвртница во односите меѓу Москва и Западот, кој, според него, ја понижил Русија по падот на Советскиот Сојуз во 1991 година со проширувањето на НАТО и навлегувањето во она што тој го смета за сфера на влијание на Москва.

Туск: Тоа е наша војна, и ако Украина изгуби, тоа е наш неуспех