Руската војска денеска објави дека назначува нов командант на „специјалната воена операција”, како што ја нарекува инвазијата врз Украина, по серијата загуби на теренот со кои се соочи во последните недели.

„Армискиот генерал Сергеј Суровикин е назначен за командант на комбинираните воени групации во зоната на специјални воени операции во Украина”, соопшти денеска руското Министерство за одбрана преку Телеграм.

Суровикин (55) е ветеран од граѓанската војна во Таџикистан во 1990-тите, втората војна во Чеченија во 2000-тите и руската интервенција во Сирија започната во 2015 година. Тој беше главен командант на Воздушно-космичките сили на Руската армија, а во инвазијата досега командувал со групата Јужни сили во Украина, според извештајот на руското Министерство во јули.

Москва ја објави одлуката за назначување нов командант по серијата порази и загубени територии кои претходно ги окупираше во Украина. На почетокот на септември, руските сили беа истиснати од поголемиот дел од регионот Харков во североисточниот дел на земјата, во украинската контраофанзива во која Киев поврати илјадници квадратни километри територија.

Руската војска, исто така, изминативе денови загуби 500 квадратни километри во регионот Херсон во јужна Украина и едвај избегна да биде опколена во Лиман, логистички центар кој сега е под контрола на Киев.

Соопштението е објавено на денот кога експлозија делумно го уништи Кримскиот мост, клучна инфраструктура за снабдување на полуостровот што Москва го анектираше во 2014 година, како и за снабдување на руските сили во Украина.