Рускиот претседател Владимир Путин им честита на граѓаните на Русија за Денот на повторно обединување на украинските територии – самопрогласените Донецки и Лугански републики и Запорошкиот и Херсонскиот регион со Русија, нагласувајќи го историското значење на овој настан.

„Пријатели, граѓани на Русија, ви упатувам искрени честитки за овој празник – Денот на повторно обединување на Донецките и Луганските народни републики и Запорошкиот и Херсонскиот регион со нашата голема, обединета земја. Пред три години, на референдуми одржани во Донбас и Новоросија, милиони наши сонародници слободно и независно ја избраа својата иднина“, рече Путин во видео порака, пренесува ТАСС.

Путин нагласи дека жителите на овие историски региони го остварија својот долгогодишен сон.

„Тие го исполнија сонот што го негуваа со години и донесоа решителна, историска одлука: да бидат со својата татковина, со Русија, да се вратат во своето родно семејство од кое отсекогаш биле дел“, додаде рускиот претседател.

Тој истакна дека целата земја води „битка“ за одбрана на овој избор и зачувување на националните интереси, заедничкото сеќавање и вредности.

Од 23 до 27 септември 2022 година, во самопрогласените републики Донецк и Луганск, како и во Запорожје и Херсонското подрачје, се одржаа референдуми за приклучување кон Русија.

Мнозинството жители гласаа за овој чекор, а на 30 септември Путин и лидерите на овие региони потпишаа договори за приклучување на овие украински територии кон Русија.