Првата фаза од пругата кон Бугарија денеска беше пуштена во употреба. Станува збор за делницата Куманово-Бељаковце, а на церемонијата присуствуваа премиерот Христијан Мицкоски, министерот за транспорт и врски Александар Николоски, голем број владини и претставници од ЕУ. Тие заедно со медиумските екипи извозеа 31 километар по пругата, чијашто изградба чинеше 78 милиони евра.

Надлежните велат ова е пруга која ќе значи економски напредок на овој регион, ќе значи поврзување со соседите и подобрување на животот на граѓаните. Денешниот ден го нарекоа историски, потсетувајќи дека станува збор за проект кој ја преживеа транзицијата, надживеа повеќе влади и нивни ветувања.

– Она што претставува една важна симболика е што изградбата на ова пруга претставува и еден синоним за победа на една неуспешна и криминална транзиција и победа над сите лажни ветувања за градбата на оваа пруга која постојано беше ветувана не само во 90-тите години, туку и две и пол децении потоа. Последниот воз кој се обратил на овие правци е далечната 1996 година и практично нејзината изградба стана мит за лагите и неуспесите за жал, на многу влади потоа – рече премиерот.

Државата претставува природна крстосница на двата коридори 8 и 10, рече Мицкоски и додаде дека ова за Владата се стратешки проекти. Тој е убеден дека наскоро ќе се заврши втората секција, како и тендерската процедура за третата секција, со што целосно железнички ќе се поврземе со источниот сосед.

– Со тоа практично ќе бидеме и дел од еден многу важен коридор не само за ЕУ, туку и за НАТО Алијансата, а тоа е коридорот којшто ги поврзува Бугарија, Македонија, Албанија, а потоа и Италија односно коридор 8 којшто ги поврзува Црното море со Јадранското – рече премиерот.

Пругата Куманово – Бељаковце е со должина од 30,8 километри и на неа се изградени три нови железнички станици (Ново Куманово, реконструирана постоечката железничка станица Куманово, 6 стојалишта, 5 мостови, 1 тунел, пропусти со различен дијаметар, заштита на наклони, одводни канали, пристапни патишта, звучни бариери, потпорни ѕидови, горен строј и сигнализација и телекомуникација. На железничките станици и стојалишта е инсталирана сигнално-телекомуникациска опрема во вредност од 10 000 000 евра, алуминиумски седишта, челични настрешници, дисплеи, лед осветлување.