Управата на ПСЖ планира идната сезона да ја врати титулата во Лига 1 и да го нападне трофејот во Лигата на шампионите и поради тоа е активна на трансфер пазарот, но за разлика од минатото, овој пат нема намера да троши премногу пари. Напротив, ПСЖ веќе потпиша со Жоржињо Вајналдум кој од Ливерпул дојде како слободен играч, а истото се очекува да го стори и Џанлуиџи Донарума на кого му истече договорот со Милан. Нов лидер на одбраната треба да биде долгогодишниот капитен на Реал Мадрид, Серхио Рамос на кого исто така му истече договорот со „кралскиот клуб“.

Преговорите со Интер се во завршна фаза и се очекува Ашраф Хакими за сума од 70 милиони евра плус бонуси, да се пресели на „Паркот на принцевите“, а петтата потенцијална трансфер бомба е Пол Погба.
Како што пренесуваат француските медиуми, спортскиот директор на ПСЖ, Леонардо имал неколку разговори со агентот на фудбалерот, Мино Рајола, а и самиот Погба наводно нема ништо против да дојде во ПСЖ.

Погба влезе во последната година од договорот со Манчестер јунајтед, но сè уште нема договор за негово продолжување иако клубот му понуди 400.000 фунти неделно со што би станал најдоброплатен фудбалер во Премиер лигата. Шпекулациите се дека ПСЖ е подготвен да понуди околу 70 милиони евра за Погба.

Италијанскиот новинар Фабрицио Романо денеска потврди дека Донарума и Хакими ги договориле сите детали и во најскоро време се очекува да бидат и официјално промовирани како нови засилувања на ПСЖ.