Високи американски трговски претставници ќе одржат разговори со своите кинески колеги оваа недела во Швајцарија, потврди Белата куќа. Тоа ќе биде прва средба во живо меѓу високи американски и кинески функционери откако американскиот претседател Доналд Трамп ја ескалираше трговската војна меѓу двете земји, објави „Еуроњуз“ .

Американскиот министер за финансии Скот Бесант и американскиот трговски претставник Џејмисон Грир ќе разговараат со кинеската делегација, во која ќе биде и кинескиот потпретседател Хе Лифенг.

Разговорите доаѓаат месеци откако претседателот Трамп ја потресе глобалната економија со објавувањето на високи царини, а Кина беше најтешко погодена од мерките.

САД моментално применуваат царини од 145 проценти за кинески стоки, додека контрамерките на Кина се на ниво од 125 проценти. Сепак, обете страни дозволија одредени исклучоци за да ги ублажат последиците.

И покрај ова, и САД и Кина ги чувствуваат последиците – трговијата меѓу двете најголеми економии во светот значително се намали.

Зборувајќи за разговорите во Швајцарија, Бесант рече дека тие би можеле да означат промена во насоката.

„Мислам дека ова ќе биде чекор кон деескалација, а не кон голем трговски договор… но прво мора да ги намалиме тензиите за да можеме да продолжиме напред “, изјави Бесент за „Фокс њуз“.

Пекинг соопшти дека ќе присуствува на разговорите откако бил контактиран од Вашингтон.

Портпаролот на кинеското Министерство за трговија изјави дека Кина нема да „жртвува своите принципи, глобална праведност или правда заради каков било договор“.

Венди Катлер, поранешна американска трговска службеничка и сега потпретседателка на Институтот за политика на азиското општество, го поздрави развојот на настаните.

„Како прва средба лице в лице меѓу високи американски и кинески претставници од инаугурацијата на Трамп, ова е важна можност за почетни дискусии за отстранување на некои тарифи, мапирање на патот напред и изнесување на загриженостите “, рече Катлер.