Шефот на Светската програма за храна, Дејвид Бисли, рече дека Нобеловата награда за мир ја донесе агенцијата на ОН во центарот на вниманието и овозможи да ги предупреди светските лидери дека наредната година ќе биде полоша од оваа и дека „без милијарди долари во 2021 година ќе има глад од библиски размери”.

Бисли изјави дека „работите се влошуваат и дека најтешката работа допрва претстои”. Тој потсети и на предупредувањето до Советот за безбедност на ОН во април дека светот, покрај тоа што се соочува со пандемијата на коронавирусот, е „на раб на пандемија на глад” што може да доведе до „глад со библиски размери” во рок од неколку месеци, ако нешто не се преземе веднаш.

– Успеавме да го избегнеме тоа во 2020 година, затоа што светските лидери одговорија со пари, пакети помош и со одложување на отплатата на долговите”, рече Бисли, според кого парите што беа достапни во 2020 година, нема да бидат достапни во 2021 година.