Преку кампањата на Црвен крст „Првата помош спасува живот“ во период од мај 2022 до март 2023 година спроведени се 736 обуки по прва помош и едуцирани се вкупно 28.206 ученици од основните и средните училишта, на возраст од 12-18 години. Учениците за време на кампањата имаа можност да стекнат основни знаења и вештини за укажување на прва помош. Обуките ги спроведоа 242 предавачи и 195 демонстратори по прва помош.

На денешниот настан на кој беа споделени информациите, министерот за образование и наука Јетон Шаќири порача дека младината која ќе се грижи за средината во која живее, ќе биде хумана, особено кон ранливите категории.

Ќе покажува решителност и одговорност секогаш кога е потребно да се помогне, доброволно и волонтерски. Во таа насока и го димензионираме образованието, да ги шири вистинските човечки, етички и морални вредности, а токму „Црвениот крст“ е еден од најголемите наши партнери. Заедно со оваа организација, се трудиме системски и преку бројни активности да влијаеме на младите и од нив да создаваме личности кои ќе бидат корисни, ценети и почитувани во општеството. Една од тие активности е токму обучувањето на над 25 илјади ученици за правилно пружање прва помош, која завршува денес, но секако, нема да биде последна. Напротив, активностите ќе се интензивираат, подвлече министерот.

Заменик-министерката за здравство Маја Манолева кажа дека граѓаните се покажани и докажани хуманисти, кои со дарувањето крв спасуваат човечки животи. Таа изјави дека Министерството за здравство во континуитет ги поддржува секогаш акциите на „Црвениот крст“.

Нашите сограѓани активно учествуваат и ги поддржуваат крводарителските акции. Показател за тоа се сите податоци од „Црвениот крст“, според кои минатата година се реализирани вкупно 56.830 дарувања, односно повеќе од предвидените 52.000, рече Манолева.

Градоначалничката на Град Скопје, Данела Арсовска се осврна на активностите на Град Скопје со „Црвениот крст“. Таа, меѓу другото, ја спомна поддршката за лицата коишто немаат свој дом, граѓаните, децата кои се во социјален ризик, сите оние на кои првата помош им е најнеопходна.

На настанот беа доделени благодарници и беше посетен градскиот натпревар по прва помош.