Специјални единици во неделата вечерта го опседнаа скопското село Арачиново, упориште на една од криминалните банди кои се во војна неколку децении. Се апсеше и се вршеа претреси, а според официјалните информации се спроведува истражна постапка против 18 лица за кои постои основано сомневање дека како нарачатели, помагачи или директни извршители др вмешани во убиства, злосторничко здружување, тешки дела против општата сигурност и изнуда.

Од 18 лица за кои се води истрага дел се во затвор, еден сам се предал додека другите се на издржување на затворска казна или се во притвор за други дела, а уапсени се нови четири лица. Тие се осомничени дека се поврзани со двојното убиство во „Шиша бар“.

Според неофицијалните информации на „Слободен печат“ главен таргет на полициската акција биле соработници на водачот на кланот „Беланоца“ чиј водач Фатљум Ајети Тоте веќе неколку години е во затвор, но има сомненија дека и од таму ја контролира својата група која е во постојана „војна“ со групата „Дуќанџик“ и „Грчец“, групата на Шеваљ Муареми кој е во Дубаи.

Во големата група „Беланоца“ има неколку криминални подгрупи, a како блиски соработници на Тоте се споменува групата „Барон“, како и неговите братучеди, Маслани од Арачиново, од кои едниот го помилува претседателката Гордана Сиљановска – Давкова. Дел од нив, според нашите информации биле приведени, а потоа ослободени.

-Првоосомничениот кој во моментов е на издржување на казна затвор, заедно со уште четири лица од кои две се во притвор, едно лице e лишено од слобода, a едно лице e починато, создале група со цел извршување на кривично дело убиство. Припадници на групата станале останатите осомничени, други неидентификувани лица и сега починати лица. Организаторите на криминалната група подготвувале планови и носеле одлуки кој, каде, кога и на каков начин ќе биде ликвидиран. Притоа, одлуките ги спроведувале лично или преку други припадници на групата плаќајќи од 10.000 до 250.000 евра за убиство. Па така, во име на поддршка на радикалното движење во РСМ или заради безобзирна одмазда кон лица од спротивставена криминална група во периодот од 2020 до 2024 година во шест кривично правни настани лишиле од живот осум лица, три лица биле тешко повредени, а на три лица животот им бил во опасност, соошти Обвинителството.

Групата се сомничи дека во 2016 година извршиле убиство во Синѓелиќ.

-Оваа група од почетокот на 2023 година до октомври 2024 година дејствувајќи според поделени улоги со намера да прибават значителна имотна корист во повеќе наврати извршила и кривично дело Изнуда. Искористувајќи исти прилики дел од членовите на групата преземале повеќе дејствија и на особено насилен начин и сериозна закана, како и со опожарување на повеќе објекти на територија на Град Скопје изнудувале парични средства на месечно ниво, но барале и исплата на поголеми парични износи еднократно. Од прибраниот доказен материјал произлезе дека еден од организаторите на групата кој е на издржување на казна затвор во период од јуни 2022 година до април 2023 година со умисла поттикнал на извршување на кривично дело Тешки дела против општата сигурност, бидејќи од страна на полициски службеници бил оневозможен да извршува кривични дела поврзани со лихварство и продажба на дрога во затворот. Па така, во три наврати поттикнал лица кои опожариле три возила на полициски службеници предизвикувајќи штета од поголеми размери, додаваат од Обвинителството.

Инаку Тоте и Зулќуф Нуредини, кој во скопското подземје е познат по прекарот Мали Репки од Батинци сега се наоѓаат во затворот во Куманово, каде беа преместени од најголемиот и најозогласениот затвор „Идризово“.

И за оваа акција како и за претходните излегоа информации дека била пробиена од „кртови“ што ги имала групата во полицијата, а премиерот Христијан Мицкоски рече дека постоела опасност акцијата да биде контаминирана.

-Претходно кажавме дека ќе има силна робусна борба против организираниот криминал. Можам да кажам дека тој процес започна со елиминирање на условна терористичка келија, за кои има сомневање дека имале намера да прават акции да ја загрозат безбедносната ситуација, но имаа поврзаност со келии во регионот. Имаше информации во текот на ноќта за акција на МВР во одредени средини каде што постојат основани сомненија дека се наоѓаат сторители на многу кривични дела кои се случиле во минатото. Ја користам оваа прилика да им се извинам на граѓаните кои биле сведоци на непријатностите, но верувајте дека постоеја основани сомненија и затоа таа полициска акција мораше да се случи, рече Мицкоски.

Во последната акција на полицијата поврзана со групата „Грчец“ беа уапсени двајца пензионирани полицајци кои ја пробиле акцијата „Планина“ што ја водеше Обвинителството уште во 2021 година, а двајца обвинители речиси една година собираа докази уште кога на чело на Обвинителството за гонење организиран криминал и корупција беше обвинителката Вилма Русковска. Таа уште тогаш соопшти дека акцијата е пробиена во Грчец. Таму беа направени претреси на 26 локации, но дрогата била отстранета, а најдени беа само 800 грама кокаин. Фатени беа само продавачите, но не и наркобосовите.

Следуваа уште неколку полициски акции за разбивање на криминалната група Грчец, но дури по три години обвинети се двајца пензионирани главни инспектори за имотни деликти, односно недозволена трговија со дрога.

Муареми прв пат како осомничен водач на криминалната група Грчец беше споменат на почетокот на годинава,пред промената на власта, кога Министерството за внатрешни работи го водеше Оливер Спасовски.

Нов момент во борбата со наркомафијата е помошта што МВР ја има од декодираните пораки на апликацијата „скај“ што ја користела групата на Муареми.
За оваа група Спасовски тврдеше дека соработувала со полицајци, судии и обвинители, но досега не е докажана оваа поврзаност.

Војната меѓу двете „Беланоца“ и „Грчец“ кулминираше по двојното убиство во „Шиша бар“ што се случи во март минатата година кога беа убиени двајцата водачи на „Дуќанџик“, Јетон Кривањева – Жила и Енес Исени Љаци и од тогаш пресметките меѓу групите се уште траат.