Пред голем број љубители на пишаниот збор во НУ Универзитетска библиотека “Св. Климент Охридски” во Битола, беше промовирана книгата “Емотивен талог” на авторката Ана Јовковска.

Станува збор за едно поинакво четиво, збирка од раскази, колумни и есеи именувани како “Емотивен талог”. Илустрирајќи ги своите лични доживувања, интимни искуства и длабоко почувствувани ситуации, таа ги преиспитува релациите на себството и Другиот, слободата и љубовта, диктатот на технологијата, моралот и ропството, социо-емоционалниот развој на децата, консумеризмот наспроти (не)грижата за природата, но помеѓу сето тоа, Јовковска гласно го поставува прашањето за среќата.

„Можеби свртувајќи се кон себе си сакав да се свртам кон светот, затоа што изминиатите две години живееме во чудно време, пандемијата не’ затекна и животот радикално ни се промени. И во време на кризи: здравствена и хуманитарна, сите бевме затворени во домовите како блокови, всушност домот ни стана затвор, па имав можност да се свртам кон внатрешното, кон интроспекција, ама низ личните преиспитувања секогаш критички рефлектираме кон светот, заедницата кон другиот и мојата нова, пета книга е хибридна книга- истакна на промоцијата“, авторката Ана Јовковска.

Промотор на книгата беше Маја Андоновска Илијевски, директорка на Центарот за култура во Битола.

„Ова емотивно , критички и самокритички настроено дело, константно се бори со прашања на кои секоја една жена треба да одговори во своите 30/40 години“ рече на промоцијата Маја Андоновска Илијевски.

Книгата “Емотивен талог” е во издание на Издавачкиот центар “Три”.