Европските производители на ѓубрива ја повикуваат Европската комисија (ЕК) да ги зголеми царините за производите од Русија, бидејќи сегашните царински тарифи се неефикасни. Според нивното мислење, европските компании ќе продолжат да губат во конкуренција со руските производители. Во моментов Европската Унија има царинска тарифа од 6,5 отсто, што според европските производители е недоволна.

На крајот на јануари, Европската комисија предложи постепено зголемување на увозните тарифи за азот и ѓубрива од Русија и Белорусија, почнувајќи од јули 2025 година. За ограничувањата да стапат на сила, одлуката мора да биде одобрена од Европскиот парламент и Советот на ЕУ. Претседателот на здружението Фертилајзерс Јуроп, кое вклучува 15 производители од земјите на ЕУ и девет национални асоцијации, ја повика Европската комисија да ги зголеми тарифите на најмалку 30 отсто и да продолжи да ги зголемува на секои шест месеци. Во 2023 година, земјите од ЕУ увезоа 3,6 милиони тони ѓубриво од Русија во вредност од 1,2 милијарди евра, објави Кликс.ба.