Иако одморите генерално се сметаат за можност за релаксација, забава и создавање незаборавни спомени, ново истражување покажува дека патувањето може да биде и исклучително стресно. Анализата на 51 најпосетуван град во светот, спроведена од „Dipndive“, откри кои дестинации се најстресни за туристите, земајќи ги предвид различни фактори како што се временските услови, впечатоците од патниците, криминалот и густината на туристите, пренесува „Дејли мел“.

На врвот на листата на најстресни дестинации е Париз, кој годишно е домаќин на повеќе од 47,5 милиони туристи на површина од само 105 квадратни километри. Тоа го прави десет пати погусто населен од, на пример, Њујорк. Иако Париз постигна просек во категориите временски услови и безбедност, токму високата концентрација на посетители беше клучна за да ја освои титулата најстресен град за посета.

По него следеше Ханој, во Виетнам, кој се рангираше на второто место.

Виетнамската престолнина имаше највисока влажност, што значи дека беше физички најнепријатната дестинација, каде туристите се чувствуваа и преоптоварено и премногу жешко.

На третото место се најде Шангај, Кина. Со 300 милиони туристи секоја година, тој собира 47.318 посетители на квадратен километар.

Градот, исто така, се најде меѓу првите 20 за оценки што го опишуваат како стресен и криминален.

За оние кои се надеваат дека ќе ги избегнат гужвите и ќе одат на одмор некаде со попријатна клима, Дубаи е рангиран како најрелаксирачки град за посета.

Со 17,1 милиони туристи што ги привлекува секоја година, има втора најниска стапка на криминал од анализираните дестинации.

Интересот за луксузната локација неодамна опадна, што значи дека има уште помалку луѓе што ги преполнуваат главните атракции.

Минхен, Германија, беше на второто место со низок криминал, пријатно време и не премногу туристи.

Тоа е многу помирна дестинација во споредба со другите европски градови.