Бенефициран стаж за одредени професии побара Сојузот на синдикатите на Македонија чиј претседател Дарко Димовски, придружуван од членови на Синдикалната организација на Бучим од Радовиш и секретарот на Синдикатот за градежништво, индустрија и проектирање на Република Македонија,  имаа средба со министерката за труд и социјална политика Јованка Тренчевска и со директорката на ДИТ, Весна Томовска.

„На средбата стана збор за потребата од утврдување бенефициран стаж на одреден број работни места во рудниците, градежништвото, за комуналните работници и за сите други работни места за кои синдикатите во изминатите години имаат доставено барања и елаборати до Министерството за труд и социјална политика. Договорено е комисијата на МТСП во наредните месеци да ги разгледа сите барања што години наназад не се разгледувани и да се изготват извештаи за секој посебно за да се комплетира процесот, со утврдување на правото на бенефициран стаж за сите категории работни места за кои тоа е неопходно“, информираа од ССМ.