Словенечката партија СДС, предложи измена на законот со кој се дозволува продажба на алкохол на приредби во училишните простории во време кога нема настава и воннаставни активности, што предизвика жестока дебата во коалицијата за тоа каква порака би испратила ваквата промена за консумирањето алкохол кај Словенците, пишува Н1 Словенија. Меѓу другото, пратениците на СДС нагласија дека со предлог-законот никако нема да се овозможи послужување алкохол на малолетници. Исто така, сервирањето алкохол би било можно само на настани што се одржуваат во училиштата кога нема часови или воннаставни активности.

Во меѓувреме од редовите на коалицијата се слушаа предупредувања дека со донесувањето на предложените законски измени ќе се испрати погрешна порака до децата. Се слушнаа и многу предупредувања за големата консумација на алкохол кај Словенците. Меѓу причините за предложените измени, пратеникот на СДС Жан Махнич посочи дека го контактирале многу поединци од различни здруженија и организатори на настани. Истовремено, тој додаде дека според важечкиот закон, забранета е продажба на алкохол во објекти и на земјиште наменето за едукација, обука и здравствена дејност.

Тоа се однесува и на училишните спортски сали, во кои, на пример, одржуваат концерт, објасни тој. Но, според него, сегашната ситуација е нелегална, бидејќи алкохолот се продава и на концерти и настани во такви простории. Се слуша дека здравствениот инспекторат е свесен за тоа и дека има тивко непишано правило дека ваквите случаи не се следат, рече Махнич. Според него, СДС предлага сегашната незаконска состојба да се промени во законска. Тој, исто така, неколку пати потенцираше дека концертите и настаните во училишните спортски сали најчесто се одржуваат за време на викендите, кога таму нема ученици.

„Јасно е дека алкохолот не е во училиште“, нагласи пратеникот на Свобода, Александар Просен Краљ.