Проблемите со кои се соочуваат студентите во студентскиот дом „Пелагонија“ ќе се решат за два до три дена, најави министерката за образование и наука, Весна Јаневска.

-Значи слушам различни шпекулации. Директорот на Студентскиот дом не си ја извршува својата функција и затоа ќе мора да преземеме чекори, во најблиска иднина побараме и поставиме нов директор. Да, студентите се жалат дека нема топла вода, храната е на навистина ниско ниво и не можеме да дозволиме неодговорни луѓе и понатаму да си играат со судбината на студентите. Младите се исклучително важни за оваа држава. Ние обезбедуваме средства од буџетот, од граѓаните и секој раководител мора сериозно да си ја сфати работат – вели Јаневска.

Минатата недела, до редакцијата на „Слободен печат“ стигна реакција од студенти сместени во „Пелагонија“ дека немаат топла вода во ноември, кога температурите се спуштаат и под нула.

-Имено, на студентските маки им нема крај. Во „Пелагонија“ во женската зграда во ноември немаме топла вода. Не знам за што плаќаме, кој е студентскиот стандард да живееме како глувци? – пишува студентка.

„Слободен печат“ контактираше и со вработени во студентскиот дом, кои потврдија дека нема топла вода и дека мајстори  работат на решавање на проблемот.

Од студентскиот дом велат дека се без директор и не можат сами да ги решаваат проблемите, а немаат земено плата од септември.

-Во септември земавме плата за јули и август и толку. Одговорот барајте го во Министерството за образование и наука, зошто досега не е поставен нов директор, бидејќи ние не можеме ништо да завршиме – изјави вработена во „Пелагонија“.

Според вработената, во „Пелагонија“ работат околу 50-60 луѓе, а сместени се околу 1.000 студенти.

При денешната посета на штипската Гимназија „Славчо Стојменски“, Јаневска најави дека со новиот буџет за 2025 година се предвидени околу 30 милиони евра или 18 отсто повеќе средства за студентскиот стандард во споредба со оваа година.