Селекторот на фудбалската репрезентација на Македонија, Игор Ангеловски, за претстојните октомвриски квалификации нема да може да смета на Енис Барди. Македонија во октомври игра против Словенија во Скопје и Полска во Варшава во рамки на квалификациите за ЕП 2020 година.

Барди на денешниот тренинг го повредил мускулот на ногата поради што ќе мора да мирува во наредните три недели.

– Енис Барди има повреда на мускулот од прв степен на задниот дел на бутот од десната нога. Се очекува Барди да му се стави на располагање на тренерот за три недели – стои во соопштението на шпанскиот тим.

Поради повредата, Барди освен настапите за македонската репрезентација ќе ги пропушти и натпреварите за Леванте против Бетис, Осасуна и Валенсија.