Идејата на англиската влада и Премиер лигата, „Проект рестарт“, се наоѓа во сериозни проблеми и речиси никој не верува дека натпреварите ќе продолжат на 12. јуни.

Владата ги охрабри клубовите да продолжат со подготовките за враќање на терените, но голем дел од нив не ги тестирале своите фудбалери, а има и големи несогласувања за идејата натпреварите да се играат на неутрални терени, но и за неподготвеноста на самите играчи за продолжување на сезоната.

Дел од фудбалерите стравуваат од коронавирусот, а некои веќе и јавно зборуваат дека не сакаат да играат.

– Што ќе ми земат? Пари? Слободно нека ми ги земат – изјави фудбалерот на Вотфорд, Трој Дини.

Некои од помладите играчи како Тами Абрахам од Челсо велат дека имаат болни родители и не сакаат да ризикуваат да ги заразат.

Но, јавноста и медиумите кои сакаат да се доигра сезоната ги обвинува фудбалерите дека се однесуваат како размазени примадони, дека се алчни и ги гледаат само своите права и дека сакаат само пари.

– Доколку не сакаат да играат нека седат дома – се зборовите на критичарите на фудбалерите, иако Владата им ја гарантира безбедноста на сите учесници доколку се почитуваат протоколите.

Екипите инсистираат да се доигра сезоната бидејќи само така ќе ги добијат парите од ТВ правата, а токму тие пари во овие тешки времиња им се неопходни и можат да ги спасат од банкрот.

Поради тоа претставниците на клубовите со своите изјави во медиумите, меѓу редови им најавија дека платите на фудбалерите ќе им бидат смалени не само за наредната година, туку сите екипи од Премиер лигата ќе постигнат договор со кој ниту еден фудбалер нема да добие договор подолг од една година.

Засега првичниот план е првото од преостанатите девет кола од оваа сезона во Премиер лигата да се одигра на 12 јуни, но постои можност тој рок да се пролонгира за седум дена.