Поради проблеми со македонскиот полициски систем, двојната гранична контрола на премините со Македонија е привремено вратена – соопшти Косовскиот центар за управување со границите.

Според нив, системот на македонската полиција во саботата паднал на целата територија на таа земја, што довело до тоа возилата што влегуваат во Република Македонија да се регистрираат рачно.

„Започната е механичка регистрација и додека граничниот систем на МВР на Македонија не се врати во функција, е воспоставена двојна контрола. Долги колони се формирани на територијата на Република Македонија. Ќе ве информираме за сите понатамошни случувања навремено“, се вели во соопштението.

Од април оваа година, Косово и Македонија воспоставија заеднички граничен премин на преминот Ѓенерал Јанковиќ – Блаце, каде што контролата се врши само при влез во земјата домаќин. Од јуни, истата практика започна на преминот Глобочица-Јажинце.

Во претходните денови, граничниот премин Ѓенерал Јанковиќ беше привремено затворен двапати, поради пожар на територијата на Македонија, пренесува Коссев.