Приватниот сектор во САД забележа пад на вработеноста во јуни, за прв пат по повеќе од две години, бидејќи компаниите изгубија вкупно околу 33.000 работни места наместо очекуваниот раст од 115.000, објави денес американската агенција за обработка на податоци АДП.

Главната економистка на АДП, Нела Ричардсон, објасни дека падот не се должи на отпуштања, туку на замрзнување на вработувањето, бидејќи компаниите се двоумат да ги пополнат слободните работни места, објави Си-Ен-Ен.

Податоците на АДП честопати не се совпаѓаат со официјалните информации од Бирото за статистика на трудот на САД (BLS), но се очекува податоците да укажуваат на зголемување на невработеноста.

Првите шест месеци од вториот претседателски мандат на Доналд Трамп беа обележани со големи промени, од царини и намалувања на владините трошоци до отпуштања во јавниот сектор.

Економистите истакнуваат дека негативниот ефект од овие мерки веќе се чувствува и предупредуваат дека пазарот на трудот слабее не поради недостаток на трошење, туку поради неизвесност.