Под раководство на јавен обвинител од Основното јавно обвинителство за гонење на организиран криминал и корупција, вчера на пет локации во Скопје и Гостивар извршени се претреси на дом и други простории при што се пронајдени и одземени автоматска пушка, пиштол, пропаганден материјал, телефонски апарати, компјутерска опрема и други предмети што ќе бидат предмет на понатамошни форензички вештачења, а од слобода се лишени четири лица.

Како што соопштија од Јавното обвинителство, претресите се извршени во рамки на активностите од минатиот месец, а се поврзани со превенција и сузбивање на заканите од тероризам.

-Акцијата е резултат на преземените дејствија на Лабораторијата за дигитална форензика при Основното јавно обвинителсво за гонење на организиран криминал и корупција, каде се откриени повеќе групи на социјалната мрежа Телеграм во кои осомничените споделувале претходно набавен и преведен пропаганден материјал на ИСИС и регрутирале нови членови – се вели во соопштението.

Оттаму додаваат дека надлежниот обвинител донел наредба за спроведување на истражна постапка против овие лица за кои постои основано сомнение дека сториле кривично дело „терористичка организација“. До судијата на претходна постапка при Основниот кривичен суд Скопје поднесени се предлози за определување на мерка притвор спрема сите осомничени.

Судијата го прифати предлогот и на осомничените им определи мерка притвор во траење од 30 дена.​

Министерството за внатрешни работи информираше дека постојат основи на сомневања дека првопријавениот создал терористичка ќелија во којашто со активно учество
делувале останатите три кривично пријавени лица.

– Намерата на членовите на терористичката ќелија била извршување на терористички акт на цивилни или така наречени меки цели односно јавни објекти на територија на Република Северна Македонија со намера да се создаде чувство на несигурност или страв кај граѓаните. Ќелијата делувала од позиција на идеолошка матрица на познатата терористичка организација ИСИС и за остварување на намерата прво пријавениот формирал повеќе групи на социјалната мрежа Телеграм, во кои што споделувал претходно набавен и преведен пропаганден материјал на ИСИС и регрутирал нови членови, се обидел да набави огнено оружје, а набавил и упатства за изработка на импровизирани експлозивни направи кои што потоа ќе ги искористат за извршување на терористички напади – велат од МВР.

Останатите членови биле дел од Телеграм групите, каде што се споделувале преведени материјали кои претходно биле преземени од официјални медиуми користени од терористичка организација ИСИС.

Во декември минатата година, по неколкумесечна истрага, беше спроведена акција во струшкиот и гостиварскиот регион во која беа приведени четири лица – три од Гостивар и едно од Струга, осомничени дека се дел од терористичка организација.

Првосомничениот, дваесет и едногодишен маж од Гостивар, на почетокот на 2024 година формирал и активно координирал терористичка ќелија, која вклучувала други осомничени и непознати лица од Македонија и странство. Организацијата, базирана на идеолошката матрица на терористичката група ИСИС, имала намера да изведе терористички напади на цивили и јавни објекти. Првосомничениот користел социјална мрежа (Telegram) за координирање активности, споделување пропаганден материјал на ИСИС, регрутирање нови членови, како и за организирање на набавка на оружје и изработка на импровизирани експлозивни направи.