„Фолксваген буба“ е мал семеен автомобил произведен од германската компанија „Фолксваген“ е еден од најпознатите иконски автомобили во автомобилската историја, познат по својата препознатлива форма. Производствениот период на „народното возило“ е најдолг од која било генерација на автомобили.

На денешен ден, 26 февруари 1938 година, Адолф Хитлер го претставил  автомобилот „фолксваген буба“, таканареченото „народно возило“.

На 26 мај 1938 година, на една ливада длабоко во провинцијата Долна Саксонија се одржала огромна церемонија: „Фирерот“ лично го поставил камен-темелникот на новата фабрика на „Фолксваген – народното возило“, заеднички проект на Адолф Хитлер и Фердинанд Порше, дизајнерот на првиот „фолксваген – народното возило“, пишува Аутоблог.

„На тој проект се пронајоа двајца мажи кои добро си одговараа еден на друг“, вели историчарот Волфрам Пита, професор по модерна историја на Универзитетот во Штутгарт.

Генијалниот инженер Порше бил познат по една мана: никогаш не бил целосно задоволен со својот изум. Така, во „Дајмлер“, каде што работел претходно, на почетокот биле среќни што тој работи за нив – но биле уште посреќни кога се ослободиле од него (секако, со богата отпремнина). Изгледало дека Порше може да потроши големи суми за развој и создавање нови проекти кои, иако денес се размислува поинаку, бидејќи тие секогаш не успевале. Вљубеникот во автомобили (иако никогаш немал возачка дозвола), Адолф Хитлер, имал друг проблем:

„На Хитлер му требаше креативна личност за да дизајнира мало возило што може да се произведува во огромни серии“, вели Пита.
Во своите мегаломански идеи, „фирерот“ не сакал да се заморува со „банални“ проблеми како парите. И тогаш се појавил инженерот Порше.

„На Порше му требаше политички покровител кој ќе му овозможи да дизајнира без разлика на можните трошоци“, резимира професорот.

За нацистите „народното возило“ било повеќе од само автомобил: поради автопатите што се граделе низ Германија, на обичните граѓани им бил потребен автомобил. Хитлер ја најавил оваа „моторизација на народот“ само неколку недели по преземањето на власта во 1933 година, а веќе следната година на Порше му била доделена задача да конструира таков автомобил. Организатор била нацистичката организација за снабдување на работниците „Сила преку радост“ (Kraft durch Freude), која се грижела за граѓаните и идеолошки, но и за нивните одмори, организирајќи летни одмори, градејќи работни одморалишта, а потоа работела и на развој на патнички автомобил за лојални поданици на Рајхот.

Со уплати за купување автомобили се започнало речиси веднаш откако Порше му го претставил прототипот на „фолксваген“ на Хитлер во 1935 година. Дури по војната, во 1960-тите, овие луѓе конечно добиле дел од нивните пари назад. За еден ваков мегаломански проект било потребно да се изгради нова фабрика. Ливадата била богато украсена со нацистички знамиња и штандови за гости. Се ширеле гласини дека Волфсбург, градот кој подоцна никнал околу фабриката, го добил името по кучето на Хитлер Волф (волк). Но сепак тоа не е точно: името Волфсбург се споменува уште во 1302 година како име на блиската тврдина која во стилизирана форма ќе се појави и на грбот на градот – и, меѓу другото, на воланот на првите повоени „буби“.

Погоден е и за воени цели
Хитлер, се разбира, додека го поставувал камен-темелникот во 1938 година, првенствено се занимавал со војна и уништување, а не со изградба. Нема сомнение дека и Фердинанд Порше знаел за овие планови: во едно од неговите експозеа за идното возило од 1934 година, тој им објавил на нацистите дека „народната кола не само што ќе биде соодветна како приватно патничко возило, туку треба да биде и транспортно возило за одредени воени цели“.

Таква беше судбината на фабриката во Волфсбург за време на војната: помал дел од фабриката произведувал воени теренски возила, додека другиот, поголем дел од фабриката, која требало да биде најголемата и најмодерната во Европа во тоа време, никогаш не била завршена. Подоцна, таму биле правени делови за нацистичката ракетна програма, но бидејќи суровините биле скапоцени, голем дел од нив биле произведувани – од дрво!

Од каде автомобилот го доби своето име?

По војната, Волфсбург се нашол во британската окупациска зона. Забележан е одговорот на британските трговски претставници на кои како воена отштета им била понудена недовршената и во голема мера уништената фабрика „Фолксваген“: „Благодарам, но не благодарам“, пишува Дојче веле.

„Фолксваген“ на тој начин повторно тргнал по својот германски пат, и набрзо станал синоним за „економското чудо“ на Западна Германија. Често може да се слушне дека возилото „фолксваген“ го добило името „буба“ (Käfer) со цел да се скрие неговото очигледно нацистичко минато. Сепак, се чини дека не е така бидејќи прекарот на моделот T1 се појавил и на англиски јазик.
Во секој случај, до 1960-тите немало потреба да се измисли посебно име за моделот: немало други модели од таа фабрика.