Шефот на руската платеничка група „Вагнер“ тврди дека неговите сили го завршиле преземањето на украинскиот град Соледар, што, доколку биде потврдено, ќе го одбележи првиот голем успех на Москва на бојното поле од минатото лето.

„Единиците на Вагнер ја зедоа под контрола целата територија на Соледар“, рече Евгениј Пригожин во аудио пораката објавена на неговиот канал Телеграм доцна вчера.

Пригожин рече дека украинските војници се опколени во центарот на градот и дека „траат улични борби“.

„Утре ќе го соопштиме бројот на затвореници“, најави тој.

Денис Пушилин, сепаратистички лидер во источна Украина, изјави за руската телевизија дека „Соледар е руски“. „Во овој момент, според информациите што ги имам, центарот на Соледар е веќе под контрола на единиците на Вагнер“, рече тој.

„Се случи пресврт во ослободувањето на целата територија на Доњецката Народна Република“, рече тој. „Сега можностите за ослободување на Бахмут и Северск се значително подобрени. Ова е всушност пресвртница, подготовките се во тек за моментот што го чекавме“, додаде тој.