Шефот на озлогласената група „Вагнер“, Евгениј Пригожин, ги нарече генералите на Владимир Путин „зло што мора да се запре“ и најави дека тргнува на „марш за правда“ кон Москва, откако, како што вели, Русија ги бомбардирала неговите армиски бази. Тој најави одмазда, а по овие зборови на Пригожин, Москва се огласи и вети дека ќе го потисне секој „вооружен бунт“.

Водачот на групата „Вагнер“ рече дека неговата армија ќе „маршира за правда“ и ќе изврши одмазднички напад врз руското Министерство за одбрана, откако сподели видео за кое тврди дека го прикажува бомбардирањето на неговите бази. Пригожин тврди и дека неговите војници собориле хеликоптер на руската армија.

Пригожин, изјави дека неговите борци и самиот тој се подготвени да загинат за татковината и ослободувањето на рускиот народ од сегашното воено раководство.

Подготвени сме да умреме, сите 25.000, затоа што гинеме за татковината, умираме за рускиот народ, кој мора да се ослободи од оние кои го бомбардираат цивилното население “, рече Пригожин во новата аудио порака.

Кремљ ги негираше тврдењата на Евгениј Пригожин, а исто така побара Вагнер веднаш да престане со „незаконските дејствија“. Русија отвори кривична истрага против водачот на озлогласената паравоена група под обвинение дека повикувал на воен удар.

Новинската агенција „ТАСС“ објави дека ноќеска биле засилени безбедносните мерки на клучните локации во Москва, дека се преземени антитерористички мерки, со цел да се засили безбедноста и засилена е контролата на патиштата.

Центарот за односи со јавноста на ФСБ ги повика припадниците на „Вагнер“ „да не грешат, да не ги извршуваат криминалните и предавничките наредби на Пригожин, како и да преземат мерки за негово приведување“, пренесуваат медиумите.

Ги повикуваме борците на „Вагнер“ да не прават непоправливи грешки, да престанат со секаква употреба на сила против рускиот народ и да не ги слушаат криминалните и предавнички наредби на Пригожин и да преземат мерки за негово приведување. Сите информации се шират на социјалните мрежи во името на Евгениј Пригожин за наводните ракетни напади на Министерството за одбрана врз единиците на ПВК на Вагнер се лажна и информативна провокација, соопшти прес-службата на ФСБ.