Превкусен рецепт на Стефанија Несторовска: Здрави ѓевречиња
Стефанија Несторовска, која стои зад инстаграм-профилот snestorovska, денеска ни приготви вистински гурмански специјалитет, омилениот појадок на сите генерации – здрави ѓевречиња.
Препорачано
Состојки:
– 2 шолји (200 грама) бадемово брашно*
– 1 шолја (240 грама) грчки јогурт
– 1 лажичка сода бикарбона
– 1 јајце за премачкување
– сусам
** бадемовото брашно може да го замените со овесно брашно, интегрално брашно и обично бело брашно. Може да пробате и со друго, со наведените брашна веќе добив успешни препораки, па можам со сигурност да ви ги пренесам.
Начин на подготовка:
Рерната се загрева на 170 степени. Се поставува хартија за печење на тава за печење.
Во длабок сад се додаваат сите состојки освен јајцето и сусамот. Се промешува сѐ додека не се добие смеса на тесто.
Тестото ќе биде малку лепливо, затоа убаво намачкајте ги рацете со масло за да ви олесни во месењето.
Тестото поделете го на четири еднакви делови. Формирајте топчиња и со прст или со обратниот дел од шпатулата боцнете за да формирате облик на ѓеврече.
Намачкајте ги со едно измешано јајце и поросете ги со сусам и со малку сол (по желба).
Печете 20 до 25 минути, односно додека не добијат убава црвенкаста боја.
Можете да уживате во нив веднаш или да ги чувате на собна температура три дена или во ладилник до пет дена.
