Со транспаренти „Нашето право за лек ваша обврска“, „Здравје пред профит“, „Бидете ни сојузници во нашата борба за живот“, пациентите со цистична фиброза го започнаа протестот пред Министерството за финансии со барање да се обезбеди буџет којшто ќе овозможи набавка на лекот „Трикафта“.

Кратко по почетокот на протестот, претставници од Асоцијацијата за цистична фиброза беа повикани на состанок со министерот Фатмир Бесими.

Претседателот на Асоцијацијата за цистична фиброза, Фики Гаспар во изјава за медиумите претходно појасни дека протестот е пред Министерството за финансии, затоа што сметаат дека доколку се обезбеди буџетот, работите ќе бидат многу побрзи.

Неофицијално, како што изјави Гаспар, на Влада поминала одлука уште 18 пациенти да го добијат лекот.

– Тоа е за поздравување, но, ние го бараме за сите пациенти за да нема несигурност и страв кај пациентите. Ако е точно, ќе има страв дали се во таа бројка, кога ќе дојде за нив, подвлече Гаспар.

Во моментот, „Трикафта“ примаат 12 лица.