Претседавачката со ОБСЕ и министерка за надворешни работи на Финска, Елина Валтонен, денеска во Белград изјави дека ОБСЕ со загриженост ги следи неодамнешните извештаи за инциденти за време на демонстрациите во Србија и нагласи дека е важно да се намалат тензиите и да се избегне провокативна реторика, пренесува Данас.

Валтонен им изјави на новинарите по средбата со министерот за надворешни работи, Марко Ѓуриќ, дека мисијата на ОБСЕ е да и помогне на Србија да изгради силни, независни, одговорни и ефикасни демократски институции, како и да ја поддржи работата на граѓанското општество.

„Сите имаме должност да ја заштитиме слободата на собирање и говор, што се фундаментални права“, рече Валтонен.

Таа нагласи дека ОБСЕ е посветена на ангажирање во регионот, како и на зачувување на долгогодишното партнерство со Србија.

Според неа, силното партнерство со Владата на Србија, независните институции, медиумите, претставниците на националните малцинства и академската заедница е клучно за напредок и постигнување одржливи долгорочни реформи и граѓански слободи во Србија.

Ѓуриќ рече дека Србија е длабоко посветена на зачувување на принципите на ОБСЕ и цврсто верува дека почитувањето на принципите на суверените држави и мирното решавање на споровите се основа за зачувување на мирот и сеопфатниот просперитет.

Кога станува збор за внатрешните предизвици, Ѓуриќ ја пренесе посветеноста на Владата на Србија да ги реши сите внатрешнополитички предизвици и прашања демократски, преку дијалог, користејќи ги европските и демократските принципи и стандарди.

Зборувајќи за ситуацијата во Косово, Ѓуриќ изјави дека ја информирал Валтонен за тешката состојба на српската заедница и ги повикал Србите од Косово, како и другите граѓани, да учествуваат на претстојните локални избори.