Претседателот на Српскиот народен совет во Хрватска, Борис Милошевиќ, денеска објави дека примил анонимно заканувачко писмо потпишано со усташкиот поздрав „За дом спремни!“.

„Некој се охрабри и се потруди да ги стави заканите и говорот на омраза на хартија и да ги испрати по пошта“, напиша Милошевиќ на Фејсбук, каде што објави и фотографија од заканувачкото писмо.

Во писмото, Милошевиќ беше наречен „небричен четник“, „еден од четничките водачи во Хрватска, но и во српскиот свет“, а Српскиот народен совет – „четнички народен совет“.

Авторот на писмото го споменува логорот во Јасеновац и Јадовно и наведува дека усташкиот поздрав „За дом спремни“ бил „мотив за хрватските бранители во војната во 1990-тите, особено за оние од Хрватските одбранбени сили, во борбата против четниците“.

На крајот од писмото стои потпис „Хрватски бранител“, со усташкиот поздрав „За дом спремни“.

Заедно со извештајот за заканата, Милошевиќ го проследил писмото до полицијата, објави Н1 телевизија.

Неодамна, претседателот на Антифашистичката лига, Зоран Пусиќ, добил слично анонимно заканувачко писмо.