Азербејџанскиот претседател Илхам Алиев потврди дека во Русија било пукано врз патничкиот авион што се урна во средата при обид да слета на пистата во Актау во Казахстан. При уривањето загинаа 38 патници и членови на екипажот, но 29 беа извлечени живи.

По два телефонски разговори со рускиот колега Владимир Путин, Алиев денеска изјави дека авионот на азербејџанската авиокомпанија бил оштетен додека летал во воздушниот простор на Русија, на лет од Баку до Грозни. Откако не им било дозволено да слетаат во Грозни, пилотите го насочиле авионот кон најблиската писта, но не успеале да го приземјат леталото.

Путин во саботата јавно се извини за „трагичниот инцидент“, но не спомна дека во Русија бил отворен оган врз авионот. Алиев денеска објасни дека авионот бил „соборен по грешка“.

– Авионот на некој начин бил жртва на електронско попречување, а потоа било пукано во него кога се приближувал кон Грозни – изјави Алиев.

Тој изрази жалење поради тоа што руските медиуми и функционери настојуваат да ја прикријат вистината за уривањето.

– За жал, во првите три дена слушнавме само апсурдни верзии од Русија. Сведоци сме на јасни обиди да се прикрие случајот – изјави азербејџанскиот претседател.

Алиев очекува Русија отворено да ја прифати вината за соборувањето на патничкиот авион и да ги пронајде и да ги казни одговорните за оштетувањето на авионот.

Азербејџан денеска им изрази почит на загинатите патници и членови на екипажот, а како херои ги слави двајцата пилоти, капетанот Игор Кшњакин и копилотот Александар Калјанинов, кои сториле сѐ што е во нивна моќ за да го спуштат безбедно леталото и се заслужни за 29-те преживеани лица.

Тие едвај го управувале изрешетаниот авион стотици километри преку Касписко Море, но не можеле да најдат безбедно место за слетување.

Пилотите, и двајцата етнички Руси, но азербејџански државјани, беа меѓу загинатите. Тие беа погребани со највисоки државни почести. Пред нивните останки, на Алејата на славните во Баку, се поклонија и претседателот Алиев и неговата сопруга Мехрибан.