Новоизбраниот претседател на Иран, Ебрахим Раиси, денес, ја отфрли можноста за средба со претседателот Џозеф Бајден како и можноста за преговори за иранската балистичка ракетна програма и за спорната поддршка што Иран им ја дава на регионалните вооружени групи.

Во текот на својот прв говор, што го одржа во петокот, Раиси изјави дека приоритет на надворешната политика на Иран ќе биде подобрување на односите со соседите. Тој исто така истакна дека иранската надворешна политика нема да биде ограничена на нуклеарниот договор со светските сили од 2015 година и дека не сака да се сретне со американскиот претседател Џо Бајден.

– Не може да се преговара за регионалните и ракетните прашања, а САД не се придржуваа ниту до претходниот договор, со цел да влезат во нови дискусии – истакна претседателот Раиси.

Раиси се осврна и на односите со САД и со Европска Унија, при тоа потенцирајќи дека Вашингтон го прекршил договорот, додека Брисел не ги исполнил своите обврски.

Тој веќе беше мета на санкции на САД и на групите за човекови права, кои го обвинуваа дека учествувал во убиството на илјадници политички затвореници во Иран во 1988 година. Раиси истакна дека тој треба да биде награден за одбрана на правата и безбедноста на својот народ, како и оти секогаш ги бранел човековите права.

Ебрахим Раиси на изборите немаше посериозен противкандидат затоа што на неговите главни конкуренти им беше забрането да учествувааѕ. Тој освои 62 отсто од гласовите.