Тинејџерот од Велика Британија, Алекс Бати, откри дека лажел за деталите од неговото бегство за да ги заштити мајка си и дедо му од полицијата. Во интервју за британски Сан, тој рече дека ја измислил приказната за четиридневното патување со надеж дека тоа ќе ја спречи полицијата да започне истрага. Тинејџерот беше пронајден во Франција шест години откако беше пријавен за исчезнат. Алекс имал 11 години кога не се вратил од одморот во Шпанија во октомври 2017 година.

Оваа година, француски возач го пронајде Алекс, кој сега има 17 години, во близина на Тулуз, откако побегнал од „духовна заедница“. Истражувачите веруваат дека Алекс избегал од руралната заедница која живее во подножјето на Пиринеите, објави весникот Стандард.

Во 2017 година, Алекс бил во Шпанија на еднонеделен одмор со неговата мајка Мелани Бати, тогаш 37, и дедото Дејвид Бати, тогаш 58. Со нив полетал на однапред договорено патување до аеродромот во Малага, од каде требало да пристигнат во приморскиот град Марбела.

Откако триото не се вратило во Англија според планираното, полицијата покренала истрага. Бабата на Алекс, Сузан Каруана, која е и негов официјален старател, изјави во 2018 година дека нејзината ќерка и поранешниот сопруг го однеле во странство за да живеат „алтернативен начин на живот“. „Тие не сакаа (Алекс) да оди на училиште, не веруваат во редовно училиште“, рече таа. Со години тој живеел со нив во пустината.

Иако првично тврдеше дека се изгубил и дека пешачел неколку дена, Алекс сега вели дека тоа било лага. „Излажав за да ги заштитам мајка ми и дедо ми, но сфаќам дека веројатно ќе бидат фатени“, изјави тој за Сан.

„Не бев изгубен. Знаев точно каде одам“, додаде тој, опишувајќи го своето патување како дводневно пешачење, прво до градот Квилан, каде што се преправал дека е изгубен и барал насоки, а потоа до Тулуз. Алекс го земал возач кој го забележал на патот во подножјето на француските Пиринеи, во близина на Тулуз.

Возачот, францускиот студент по фармација Фабиен Ацидини, рече дека Алекс му кажал дека пешачел по Пиринеите четири дена и четири ноќи, дење спиел и ноќе пешачел за да не биде виден.

Сè што имаше имал биле 100 евра во готовина, без мобилен телефон се упатил кон Тулуз, хранејќи се со се што ќе најде во полињата и градините, рече Ацидини. Тој го возел тинејџерот до Ревел, недалеку од Каркасон, и го оставил во локалната полициска станица.

На исчезнатото момче му здодеала пиринејската дивина: Те сакам Бабо, сакам да се вратам дома!